പുച്ഛം

ആരോ വലിച്ചെറിഞ്ഞൊരു തുണ്ടു
കടലാസിനും പുച്ഛം
ചവറ്റുകുട്ടയിലെ തല തിരിഞ്ഞ
നികൃഷ്ഠ ജീവിക്കും പുച്ഛം.


കൂട്ടിലടച്ച കിളിക്കും കുരങ്ങിനും
കഴുതക്കും വരെ പുച്ഛം
രോഗമെന്നോതി വരുന്ന  അണു-
ക്കള്‍ക്കും, കാലനും പുച്ഛം.

ഇരുകാലുള്ള എന്നോട്
ഞൊണ്ടിക്കാലന് പുച്ഛം
ഇരുകയ്യുള്ള എന്നോട്
ഒറ്റകയ്യനു പുച്ഛം.

ഭക്ഷിക്കുന്ന എന്നോട്
വിശപ്പിനു പുച്ഛം
ധൂര്‍ത്ത്ടിക്കുന്ന എന്നോട്
പിച്ചക്കാരന് പുച്ഛം.

അളവില്ലാ ഭാരമുണ്ടിന്നെന്‍
നേര്‍ക്കുള്ള പുച്ഛത്തിന്
പുച്ഛമാണീ ലോകത്തിന്നും
എനിക്കുമെന്നോട് തന്നെ.